Isang sikreto I.

Isang araw, katulad ng ibang araw, araw-araw ay sinabi/ sinasabi ko:
"Gusto kong magising ng maaga at tumambay sa lagoon para makita ko ang pagbuka ng mga lotus. Tapos kukunan ko ng video. Kahit gaano katagal. Kahit gaano kalamig 'pag umaga. Tapos ibibigay ko sa'yo yung footage."


Isang araw, katulad ng ibang araw, araw-araw ay umaligid/ umaaligid ako sa tabi ng lagoon at tinitignan ko kung makakaya kong abutin ang mga lotus. "Pipitas" ako ng isa at ibibigay ko sana sa'yo kaya lang masyado silang malayo. Baka mahulog ako. Hindi ako marunong lumangoy. Malalim pa naman yata ang tubig (?).


Isang araw, katulad ng ibang araw, araw-araw ay inisip/ iniisip ko sa tuwing dadaan tayo sa lagoon:
"Sana isang araw "pumitas" ka ng kahit isang lotus para sa'kin. Ako na ang pinakamasayang tao 'pag nangyari 'yun. Alam mo namang mababaw lang ang kaligayahan ko."


Isang araw, katulad ng ibang araw, araw-araw ay naisip/ naiisip kong
sila marahil ang sarili kong hindi ko magawang panoorin ang paglago, ang pagbuka. Wala ring ibang nakakakita sa kanila. Masyadong masukal at madilim ang paligid nila. Lahat ay abala. Nagmamadali. Dinaraanan lang sila. Parang ikaw. Hindi mo rin talaga ako nakikita.

- Glenn, alam kong hindi mo 'to kinuhanan dahil sa akin. Pero salamat. May something lang talaga ko sa mga lotus na ito. Sa lagoon. Nahagip mo.


Photo taken from http://glennmichael.multiply.com