Habulan -Taguan

Hindi nawawala ang tula
dahil hindi kailanman
nawawala ang tugma
at talinhaga.

Kung kaya’t
Hindi ako ang iniwanang
Naghihintay lamang
Na iyong balikan.

Sapagkat,
Ako ang lumisan
Na hindi man lamang
Nag-abalang
Sayo ay

Magpaalam.


*

May bumabalik.

Subalit -
Hindi lahat ng pagbabalik ay may katiyakan ng pananatili.
At hindi lahat ng pananatili ay nangangahulugang may pagbabalik.

*

Sa mga ganitong panahong marami akong pinaglalaruang salita ay nababatid kong may hinahanap ako.

- Pwedeng mga salita rin mismo ang hinahanap ko.

Maraming paraan upang ipahayag ang damdamin subalit hindi lahat ng paraan ay angkop o kaya kong abutin. Kaya marahil, napipilitang akong gumawa ng sarili kong paraan upang magpahayag, hindi man marinig; hindi man maunawaan. Kung minsan, sapat na sa aking ako lang ang nakakaalam.